فانيليا تبحث

خلينا شوية من نهاية الكوكب المأسوف على عمره وخلينا نتكلم كلام بنات..ولو أن الموضوع ينفع لكل الناس يعني بس ظاهر في البنات أكثر 🤷‍♀️

عن دلدقة المشاعر غير الحقيقية أتحدث 😁

من فترة كده شفت فيديو حفلة خطوبة وكانت البنت بترقص مع خطيبها على أغنية نداء شرارة اللي عملت ارتباك لبنات كثير على ما يبدو..

الولد شكله كأنه  أنه مندهش كده والبنت عمالة بتتنطط كأنها هتطير فعلا.. بغض النظر عن أي تحليل مالهوش لازمة..

اللي لفت نظري أن الفيديو ده وفيديو غيره شبه جدا واحد أولاني خالص كان نازل من قبلها بفترة واتشهر.. تعليقات البنات كانت كثير جدا على شكل فستان البنت وشكل فرحتها بخطيبها ومنشنز في كل حتة..

فالفيديوهات اللي بعدها كانوا أشبه بمحاكاة للبنت وطريقتها وحتى شكل الفستان..

إحنا ممكن نقلد حاجات كثير ومش كلنا نقدر نبقى genuine في كل حاجة..

بس المشاعر لازم تبقى genuine ياخوانا ..

المشاعر ما ينفعش تبقى تقليد بجد والله عشان فيه ناس كثير بتلبس في الحيط بسبب كده..

طبيعي أننا نشوف تجربة ونحس أننا نفسنا نعيش زيها..

مين يعني في سن المراهقة ماكنتش عايزة تبقى بطلة قصة نور ومهند وكان نفسها تضرب نور على بقها (الولية دي )عشان بترفس النعمة؟

لكن أنك تدلقي فيض من المشاعر اللي نفسها تطلع في أول فرصة ده مؤذي جدا ومافهوش حكمة أبدا..

و ال captions العميقة وموضاتها ضيعتنا

أنتِ بيعجبك الكابشن والصورة تفضلي حاطاهم في بالك..

خالتك بتكلم مامتك على عريس انهارده بتتخطبوا بعد أسبوعين..بتنزلي صورة الخطوبة وengaged ..

بعدها بيومين بتخرجوا مع بعض وتكتبي على الصورة my backbone..

لحق إمتى؟

والكلام ينطبق على المتجوزين برده..بتبقى عايزة تتجوز بسرعة عشان تكتب أول رمضان في بيت مودي وبنسبح ربنا على إيد بعض..وهو بيكون عايز يتجوز بسرعة عشان أسباب أخرى..وبتلبس هي يا عيني بيت مودي وشغل بيت مودي..والتسبيح بيبقى حسبنة في الآخر..

الحكمة هي أننا نتأنى في مشاعرنا مع أي شخص قدامنا ونتحرى الصدق فيها..

أنتِ نفسك تقولي على حد أنه ظهرك وسندك أو أي حاجة ثانية ..قبل ما تقوليها على صديقة أو خطيب أو زوج او أيا كان الشخص فكري هي فعلا مشاعرك الحقيقية تجاه الشخص ولا مشاعر نفسك تعيشيها..وهل الشخص ده يستحق المشاعر دي بمواقف  فعلا؟

ما نستعجلش في مشاعرنا ونسيبها تاخد وقتها ونسيب الوقت الكافي والمواقف تشكل علاقتنا بالناس ومشاعرنا تجاههم ومكانهم في حياتنا عشان تكون مشاعر ناضجة فعلا مش حاجة من على الوش لا يعوَّل عليها..

وأختم كلامي أختي العزيزة بمقولة المأذون في الواد سيد الشغال: " تريثي ولا تتعجلي"