Smile

هم

هم ما يعرفونيش..بس أنا أعرفهم من سنين..

و بحسهم قريبين على قلبي أوي..

 شاركتهم لحظات كتير من حياتهم ..و من قريب..

لحظات  نجاح و فشل..قوة وضعف..قمة الفرح وقمة الإنكسار..الإنتصار و الهزيمة..

حتى لحظات التهييس و الهلوسة..عشتها معاهم..

عاصرت تطورات كتير في حياتهم ..

اللى كان في مدرسة ودخل الجامعة..و اللى كان كان في جامعة و اتخرج و اشتغل..و اللى اتجوز و خلف..اللى سافر و اللى رجع..

الصغير كبر..و الكبير كبر أكتر..

أعرف آرائهم في الحياة..أعرف فلسفتهم وأعرف فزلكتهم..

أعرف مين توجهاته ايه..و مين مالهوش في ايه..و مين اللى مالهوش في حاجة..

حتى الناس اللى بيحبوا يسمعوهم أعرفهم..

منهم اللى بحس انه شبهي أوي..و منهم اللى عكسي تماما..

تفاصيل صغيرة كتير من حياتهم اتجمعت و اتشبكت مع بعض مع الأيام..

وطلعت في الآخر..
صديق..
صديق فتحلي شباك على حياته  اسمه مدونة..

أيوة صداقة من طرف واحد..

أيوة افتراضية..

 أيوة هو  ما يعرفش عني حاجة..

وأيوة المعرفة مش كاملة لأن اللى  أعرفه عنه هي الحجات اللى سمحلي أعرفها..

بس في النهاية ماقدرش أمنع شعوري بقربهم على قلبي و شعوري اني أعرفهم كأنهم عشرة سنين..انهم يوحشوني لما يغيبوا..اني ابقى عايزة اطمن عليهم من وقت للتاني..

و حتى اني أفتكرهم في دعائي لما يبقوا محتاجينه..
قد أبدو للبعض عاملة فيلم عربي و مبالغة..و قد يبدو كلامي عادي و طبيعي جدا..
و بالرغم اني ساعات بحس اني عبيطة بسبب الموضوع ده..إلا اني سعيدة جدا بصداقاتي الإفتراضية اللى عمرها سنين..
سعيدة لأني استفدت من تجاربهم و شخصياتهم و عوالمهم المختلفة اللي سمحولي أدخلها..
وأعتقد اني  استفدت أكتر ما فدت في التجرية دي..بس أتمنى يجيلي يوم أفيد فيه ..
كل عام وهم بخير
كل عام و انتم بخير :)