...

ما تراهنش على فشلي

فشلي عمره ما هيخلي فشلك نجاح

و نجاحي عمره ما هيخلي نجاحك فشل
انت هناك و انا هنا
و كل واحد بيعمل اللي شايفه صح

Don't worry..Be happy

some space

إلى : صديق شخص بيميل للصمت

مش لازم علشان ساكت لفترات طويلة يبقى مكتئب..يمكن في أفكار شاغلة تفكيره ومش بالضرورة يبقى عايز يتكلم عنها أو يشاركها مع حد..يمكن يبقى بيحب يفكر لوحده كتير و لو حب يفكر بصوت عالي أكيد هيفكر معاك..
لو مكتئب و مش عايز يتكلم يبقى بجد مش عايز يتكلم..كل اللي محتاجه some space و رغبتك في انك تبقى معاه يمكن ما تساعدش  و تعقد الموضوع..لأنه لو بيبقى رخم لما يكتئب هيحصل حاجة من الاتنين..يا إما هيرخم عليك و انت تزعل و يبقى اتضايق أكتر من الأول..يا إما هيضغط على نفسه علشان مايبقاش رخم معاك و يزعلك..و كده يبقى ضغط عليه أكتر..
لو هي مسألة وقت بالنسباله و ربنا كارمه و بيعرف يخرج نفسه من الإكتئاب ما تقلقش عليه..
قوله "أنا حاسس بيك و حاسس قد ايه انت متضايق..بس خليك متأكد اني جنبك..ولو احتجت أي حاجة أواحتجت تتكلم هتلاقيني موجود."
و سيبه..إديله وقته و مساحته..و هو لو محتاج يتكلم معاك هيتكلم..وما تخافش..انت كده وصلتله انه مش لوحده..
نصيحة ليك: لو بتحبه أوي ماتروحش  تكتئب انت كمان و تزعل على زعله..احنا كده ما عملناش حاجة.. كفايا واحد كئيب ليه نزودهم اتنين و ندور على واحد تالت يطلعك انت كمان من اكتئابك..ادعيله كتير و عيش حياتك طبيعي..
ولما يرجع..عادي جدا ولا كأن في حاجة حصلت..حسسه بس انك مبسوط انه رجع..و حسسه دي مش  معناها قوله خالص..

طبعا مش بنتكلم خالص عن الشخصيات اللي ما ينفعش تتساب لوحدها للإكتئاب..اللي مثلا ممكن يوصلوا لإكتئاب مرضي..أو اكتئابهم بيخليهم يتوقفوا لفترة طويلة عن ممارسة الحياة لفترة طويلة و بيحتاجوا حد يخرجهم لأنهم لو سبتهم هيفضلوا زي ما هم للأبد..أكيد لازم نراعي فروق الشخصيات..و نراعي ان كمان ان الموضوع نسبي..

لازم كمان نبقى فاهمين ان الناس بتختلف في طرق تعبيرها عن نفسها..علشان كده لوعايز تفهم أو تساعد صاحبك أو تبسطه بلاش تقيس على نفسك..شوف شخصيته هو ايه أكتر حاجة مناسبة ليها و اعملها..و أعتقد لو انتو صحاب فعلا هتعرف تكتشف الحاجة دي

___________

لو حسيت ان شخص غريب أو أول مرة تقابله..أومعرفتك بيه من بعيد لبعيد محتاج مساعدة..أي نوع بقى مادية (مش قصدي فلوس طبعا) أو معنوية..
اسأله : "انت كويس؟ "طيب في حاجة ممكن أعملها؟" أو"محتاج مساعدة؟"
لو قالك انه الحمد لله كويس وأكد لك انه مش محتاج مساعدة امشي و سيبه و ما تبقاش رخم و فضولي..لو هو قرر انه ما يعرفكش علشان يحكيلك قصة حياته أو يطلب مساعدتك..ما تفرضش نفسك عليه.. ممكن جدا ما يبقاش مرتاح في وجود حد غريب في موقف زي ده..و وارد جدا يبقى مقلق منك..انت عرضت مساعدتك وعملت اللى عليك و رضيت ضميرك..

طبعا هنا برضه مااقصدش واحد مرمي في الشارع بيموت..تروح انت "تسأله انت كويس؟" محتاج مساعد؟" فهو ما يردش علشان مش قادر..فتروح سايبه هو ماشي..ده موقف مبالغ فيه..بس اللي اقصده اننا لازم نبقى اذكيا كفاية و نعرف نقيم الموقف...
___________

طبعا كل الكلام اللي فوق ده من وجهة نظري المتواضعة ..كلمة لازم و طبعا و أكيد اتكررت كتير..بس مش المقصود منها فرض وجهة نظري على حد.

بيبعت

Everytime I decide to CHANGE my lifestyle,it ends up changing my profile picture on Facebook :(

عاملة نفسي عبيطة..كأن ماحدش مات..ماحدش اتدهس تحت مدرعات..المجلس العسكري زي الفل..كله تمام..مصر بخير..كلنا مبسوطين


كنت عايزة المدونة دي تفضل الجانب المشرق مني..لأني شخصية لا توصف بإنها متفائلة..أنا باشوفني واقعية..في ناس بتشوفني متشائمة..يمكن صح..يمكن!!..بس أنا دايما بابني تفكيري على معطيات..مش شايفة معطيات تبشر بحاجة كويسة..بس في نفس الوقت صعب تتنبأ بنهاية الماتش..
المصريين عملوا ثورة بعد ما كلنا فقدنا الأمل في نفسنا وفي كل حاجة
بس في نفس الوقت 30 سنة سكوت كتيير أوي و بتدل على حاجات كتير


 مؤمنة ان كلنا نستحق حياة أحسن..لأن أي بني آدم خلقه ربنا يستحق حياة كريمة
 إيماني بالسواد الأعظم من المصريين رجع يتهز
بس إيماني بالأقلية المغيرة ما اتغيرش عشان هم ما اتغيروش..لا زادوا ولا نقصوا
و في النهاية إيماننا بكرم ربنا أكبر من كل حاجة و أكبر من أي حد
________

"يبعت.. الله كبير
يبعت.. للفقير
بيبعت.. مرات شوي
 بيبعت.. مرات كتير
بيبعت..شمس وفي
بيبعت.. نار ومي
 بيبعت.. ما عنده صغير
 بياخد.. ما عنده كبير"
=)

و يعدي الصيف

يعدي الصيف - كايروكي

Smile-2

هو أنا ليه مقضياها صور؟!